TAMOBA: Wizi wa Pikipiki Dar Es Salaam sasa Basi

Mkuu wa Wilaya ya Ubungo Mhe. Kisare Makore amewataka wa vyombo vya moto kuzingatia sheria za usalama Barabarani wakati wawapo barabarani ili kuepuka ajali zinazosababishwa na madereva wazembe na kuwataka kufanya kazi kwa kuzingatia sheria zilizopo.

Mkuu huyo wa Wilaya ameyasema hayo wakati wa uwekaji saini wa mkataba kati ya Chama Cha Madereva na wamiliki Pikipiki Mkoa wa Dar es Salaam (CMPD) na Kampuni ya Tanzania Motorcycle and Bajaji Association (TAMOBA) kwaajili ya kuzisajili Pikipiki na Bajaji katika mfumo wa GPS utakaowawezesha kujua Pikipiki iliyoibiwa ipo eneo gani na kuweza kupatikana kwa haraka zaidi.

“Aidha Mhe. Makore amesema madereva wa Pikipiki na Bajaji walikuwa na wasiwasi wa kuibiwa vyombo vyao hivyo ila TAMOBA imeleta usalama mzuri kabisa wa kisasa kwa kuwa madereva hao watafanya kazi zao wakiwa hawana wasiwasi wa kuibiwa Pikipiki zao na mali zao wawapo katika majukumu yao hayo pamoja na abiria wao.

Nae Afisa Utumishi wa TAMOBA Bw. Erasto Lahi amesema kwamba Kampuni ya TAMOBA inatoza Shilingi mia moja kwa siku kwaajili ya kulinda Pikipiki na Bajaji ya kila atakayesajiliwa na Kampuni hiyo kwa mfumo maalum wa GPS utakaowezesha kujua Pikipiki iliyoibiwa ipo wapi, inatumiwa na nani na kuwezesha kui-lock hapohapo ilipo.

“Mtu aliye katika mfumo huu atapata msaada wa kulindwa kwenye mfumo muda wote masaa 24, hivyo mmiliki wa chombo muda wowote akihitaji taarifa za chombo kilipo, kilipopita na kinapoelekea atazipata, pia mfumo huu utaunganishwa na Jeshi la Polisi moja kwa moja ili kuharakisha zaidi huduma za kiusalama” Alieleza Bw. Lahi.

Hata hivyo Bw. Lahi alieleza mfumo huo utasaidia kuokoa gharama za kulipia Bima kubwa kwa kuwa kipengele cha hofu ya usalama wa chombo chake kitafanyiwa kazi masaa 24 labda iwe kwa sababu zingine, mfumo huu unawahakikishia wamiliki kwa kushirikiana na Jeshi la Polisi watakuwa salama.

Baada ya makubaliano ya pande zote mbili katika kusaini mikataba hiyo,Mkuu wa Wilaya ya Ubungo Mhe. Kisare Makore alizindua kituo cha Chama cha madereva na wamiliki wa pikipiki  mkoa wa dar es salaam (CMPD),Na kuahidi kuwapatia compyuta kwaajiri ya ofisi hiyo.